Зуны тэргүүн сарын шинийн 15-ны энэ өдөр Бурхан багшийн их дүйчэн өдөр тохиох бөгөөд хүрээ хийд бүхэн тахил тавиг засаж, ерөөл магтаал уншин, хурал хурдаг уламжлалтай. Энэ өдөр үйлдсэн буян ихэд арвиддаг учир зон олноороо бурханы ном, буяны үйлд шамддаг юм. Дашгимпэллин хийдийн хувьд уламжлалт хурал номыг хурхын зэрэгцээ нутгийн дуучид, аймгийн удирдлагуудын хамтаар гадаа талбайдаа 108 мод тарьлаа. Тус хийдийн хамба лам Б.Доржхорол нутгийн зон олон ард түмэндээ хандан Бурханы шашинд мод тарихыг суварга босгохоос дутахгүй үнэ цэнэтэй үйлд тооцдогийн учир байгаль эх дэлхийгээ хайрлах, хамгаалах буяны гэгээн үйлсэд нэгдэн мод тарихыг уриалж байна.